Address to the Unco Guid, or the Ridgidly Righteous
Robert Burns
My Son, these maxims make a rule,
An’ lump them aye thegither;
The Rigid Righteous is a fool,
The Rigid Wise anither:
The cleanest corn that ere was dight
May hae some pyles o’ caff in;
So ne’er a fellow-creature slight
For random fits o’ daffin.
—Solomon, Eccles. 7. 16
O ye wha are sae guid yoursel’,
Sae pious and sae holy,
Ye’ve nought to do but mark and tell
Your neibours’ fauts and folly!
Whase life is like a weel-gaun mill,
Supplied wi’ store o’ water;
The heaped happer’s ebbing still,
An’ still the clap plays clatter.
Hear me, ye venerable core,
As counsel for poor mortals
That frequent pass douce Wisdom’s door
For glaikit Folly’s portals:
I, for their thoughtless, careless sakes,
Would here propone defences—
Their donsie tricks, their black mistakes,
Their failings and mischances.
Ye see your state wi’ theirs compared,
And shudder at the niffer;
But cast a moment’s fair regard,
What maks the mighty differ;
Discount what scant occasion gave,
That purity ye pride in;
And (what’s aft mair than a’ the lave),
Your better art o’ hidin.
Think, when your castigated pulse
Gies now and then a wallop!
What ragings must his veins convulse,
That still eternal gallop!
Wi’ wind and tide fair i’ your tail,
Right on ye scud your sea-way;
But in the teeth o’ baith to sail,
It maks a unco lee-way.
